【明報專訊】立法會噚日再舉行午間音樂表演，搵咗一班小朋友去立法會大樓唱聖誕歌。呢個音樂會令唔少議員可以鬆一鬆，因為連日嚟審議《議事規則》嘅修訂，令大家都好攰。

除咗主席梁君彥、「實政圓桌」田北辰等建制派議員出席，泛民主派都有議員忙裏偷閒去同小朋友一齊唱歌，包括教育界葉建源、公民黨楊岳橋同民主黨林卓廷等。

聽下小朋友唱歌的確可以減吓壓。小朋友唱嘅Jingle Bells響徹整座大樓，同一時間會議廳就「子彈橫飛」，民主派為咗抵抗修改《議事規則》喺會上示威，當時朱凱廸就係喺Jingle Bells嘅歌聲下畀保安抬離場。