【明報專訊】噚晚係理工大學建校80周年晚宴，請嘅嘉賓星光熠熠，除咗有特首林鄭月娥，仲有唔少官員，包括食物及衛生局長陳肇始(Sophia)、發展局長黃偉綸(Michael)等，近排參選港區人大代表嘅鄺美雲都喺度𠻹。

Michael同Sophia噚晚仲喺晚宴度大開金口，高歌一曲，而理大校長唐偉章就幫佢哋以結他伴奏。

Michael唱咗首《總有你鼓勵》，平時都鍾意唱歌嘅Michael歌喉唔錯，台下仲唔少人大叫「Encore」。Sophia唱咗首《月亮代表我的心》，但音樂聲似乎太大，Emily都唔係好聽到佢唱成點。

唐偉章就一口氣彈咗幾首歌，平時一臉嚴肅嘅唐校長，原來彈起結他上嚟又幾有型，而且「吸金力」超強，夾夾埋埋最少籌得成200萬捐款。