【明報專訊】獲准保釋嘅「雙學三子」黃之鋒、周永康同羅冠聰，噚日聯同工黨立法會議員張超雄及社福界立法會議員邵家臻，去懲教署總部遞交「改善香港在囚人士權利及監獄環境建議書」，希望向懲教署反映囚中實况，推動懲教改革。

「青少年囚犯人權關注組」成員林啟成亦現身說法，佢代表其他過來人投訴昔日喺懲教所時遭體罰同精神虐待，例如被灌水、30秒冲涼、「食狗飯」等。佢話終於有受害人現身投訴，希望署方唔好視而不見，對被虐者造成二度傷害。

雙學三子各有意見﹕周永康唔滿意囚犯喺集隊時要「踎班」等候點名嘅安排，希望懲教署改善整體機制；羅冠聰特別關注「懲教」嘅「教」部分，希望囚友喺獄中都可以學以致用；黃之鋒就質疑囚友要全身赤祼蹲下回答職員問題嘅做法唔合理，令在囚者尊嚴同精神受損。

懲教署發聲明，指以專業態度，按法例執法，亦會照顧在囚者基本需要，但所有在囚者嘅待遇均須受到合理同恰當限制，又話已將一啲曾服刑者受虐嘅指控個案，轉交其他執法部門調查。