【明報專訊】再有上屆班子官員申請離職後再就業，「前任行政長官及政治委任官員離職後工作諮詢委員會」噚日公布，財經事務及庫務局前局長陳家強今日起重返科技大學做兼任教授，工作包括為商學院教學、研究及協助課程發展。委員會同意陳教授喺呢個新工作，唔會損害或削弱政府履行職能嘅表現，亦唔會引起人擔心佢會得到延取報酬或利益等，故批准有關工作。 陳家強早於1993年已經加入科技大學教書，2002年7月起擔任科大工商管理學院院長，至2007年7月加入政府做局長先離開科大，今次可以算係「回娘家」，佢離開政府前曾經同傳媒提及，返科大會希望培育FinTech人才。 科大校長陳繁昌將於2018年9月離任，外間曾經傳陳家強係接任人選之一，陳家強雖然講過無計劃做校長，不過唔知日後佢會唔會仲有更多新崗位呢？
|
| |
| |
