張建宗愛工作 每朝提早15分鐘「興奮」

[2017.07.21] 發表

【明報專訊】政務司長張建宗喺今年4月出席一國兩制青年論壇致辭，因為普通話發音「技驚四座」，一度成為熱話。張建宗喺七一宣誓就職當日，普通話已經有進步，但港式發音味道濃。佢噚日同傳媒聚會時話，「知道自己(普通話)不足，會努力」，話過去無乜機會練習普通話，𠵱家已經上堂惡補。

張建宗好熱愛工作，曾經講過「每日返工前、企喺鏡前打領呔，就開始興奮」。佢話舊時每朝5點9左右起身，𠵱家仲早多15分鐘，5點半起牀。睇嚟張建宗對工作熱誠完全無減退，佢噚日同傳媒聚會時講足兩個幾鐘，非常起勁。

張建宗話，暫時仲未搬入政務司長官邸，因為官邸仲有一啲基本維修做緊，包括換冷氣系統同水喉，佢強調唔會裝修、美化官邸，估計基本維修工程需時兩個月，完工之後就搬入去。張建宗仲話，自己連官邸嘅網球場喺邊都唔知道。

至於會唔會開facebook同網民交流，張建宗話畀啲時間佢，因為𠵱家工作實在太繁忙，未有時間打理fb，形容fb係要「養住」，就好似種花都要淋花。佢話會請政治助理，仲希望可以有多啲年輕人加入辦公室，但人選就未敲定。

更多港聞