【明報專訊】民建聯近年着重網絡攻勢，仲記得上年立法會選舉時，4個元老包括創黨主席曾鈺成、前主席譚耀宗，以及立法會前議員葉國謙同陳鑑林，就拍片邊打牌邊論政；今年係民建聯25周年，4個元老亦會再為個黨獻身，黨慶重頭戲係9月喺紅館開兩場騷，4個元老都會登場演話劇，民建聯副秘書長黎榮浩(Joe)話，呢套話劇嘅導演係高志森。

4元老﹕曾鈺成譚耀宗葉國謙陳鑑林

阿Joe話，民記將會於9月23、24號一連兩日喺紅館開騷，畀啲會員高興吓，而當日就會演出一套名為《愛國愛港二次方》嘅諷刺時弊話劇，4個元老早前拍片攻打四方城，今次就會搬上舞台，但佢噚日就未有提及呢套劇有無咩惹火內容喇。

除咗話劇，該黨未來兩個月將會舉辦街舞、花式跳繩同歌唱比賽等，勝出者9月亦有機會喺紅館表演。

除咗表演，民記設計咗印有25周年口號「擇善有為」等字句嘅布袋同便條紙，派畀會員，希望藉此令佢哋了解民建聯理念。該黨副秘書長葉傲冬噚日亦介紹民建聯吉祥物「建仔」，相信日後不時會出現喺地區，阿冬話「希望市民見到建仔就知民建聯落區」。