【明報專訊】候任特首林鄭月娥早前獲國務院任命為第5任香港特首，將會喺7月1日就職。但噚日就有市民入稟高等法院申請司法覆核，指林太未能得到過半市民支持，又話佢係經不公平同受操控嘅選舉產生，要求法庭解除林太嘅候任特首資格，同頒令禁制籌組新政府。 候任行政長官辦公室就話案件進入咗司法程序，所以唔會評論。申請人王旺上親自撰寫入稟狀，佢話需要經一個公平、無操控嘅選舉，並要有過半香港市民支持，林太先可以當選，仲話林太今次當選係損害市民得到和諧嘅機遇，同民主自決嘅機會，想入稟推翻佢身為候任行政長官嘅資格。但Emily留意到，王旺上除咗將中華人民共和國、中央政府、國家主席習近平同特首梁振英列為有相關利益者外，亦將全港700萬市民列為相關利益者，唔知到時候由身為700萬市民之一的法官審理會唔會有衝突呢？
|
| |
| |
