【明報專訊】司法機構前日同個別記者講，會喺運作只有半年、但已經多次因為採訪及拍攝問題起爭執嘅西九龍法院大樓門外，幫記者劃兩個記者區。司法機構首席新聞主任郭筱茹當時拍晒心口話已經通知法院保安有關安排，但Emily噚日朝早喺記者區拍攝時，有保安衝前話唔可以影相，要記者解釋佢先知道有關安排噚日生效。

黃線劃區 昨變「落貨位」

兩個記者區位於兩棟大樓門外嘅一旁，用黃線劃咗長方形，但噚日朝早有貨車喺記者區落貨，已霸佔大半個記者區，保安亦無理會。記者區範圍雖然有約3米乘5米，但若有咩世紀大案，相信只有企前排嘅記者能夠影到相，仲會迫爆記者區，保安噚日亦多次提醒記者唔好「過界」及「踩界」。

司法機構就回覆話有關安排屬試驗措施，會視乎運作需要按實際情况相應調整，會再次提醒保安人員有關記者區措施嘅安排。