薯仔失收 卡樂B停部分日版貨 無淡鹽牛油味薯片 港版無影響

薯仔失收卡樂B停部分日版貨無淡鹽牛油味薯片港版無影響

[2017.04.11] 發表

【明報專訊】鍾意食日版進口卡樂B(Calbee)薯片嘅朋友要留意，日本北海道舊年多番受颱風影響，以致今年薯仔大失收，卡樂B近日宣布，部分日版薯片要暫時停產。日本薯片供應緊張，但港人又唔使咁驚無薯片食，因為香港卡樂B發言人話，本港工場有團隊喺世界各地採購薯仔，所以無受今次日本薯仔短缺事件影響，無論售價定款式都唔受影響。

港卡樂B：世界各地買薯仔

日版卡樂B有七成原料來自北海道，受薯仔短缺影響，公司現有嘅薯仔存貨已經見底，因此旗下部分產品需要暫時停賣，包括較受歡迎嘅淡鹽味及牛油味等薯片，部分產品自上月下旬已出現斷貨，有關產品或要等到5月下旬，九州薯仔收成後先有得補貨。不過，有日本農業批發人士認為，九州嘅薯仔產量比北海道少，加上受到舊年熊本地震影響，薯仔數量應會更少，故暫時無法滿足市場需求，停賣可能要持續一段時間。

一田：多引歐美薯片

本港一田百貨就話，超市目前仲有日本進口嘅卡樂B薯片供應，但供應量由舊年年底開始緊張，特別係限定一啲口味，要由唔同途徑搵貨源，之後嘅供應會唔會受影響就未知，會同供應商保持聯絡，留意情况，亦會多引入歐美薯片畀客戶選擇。專賣進口零食嘅優品360°話受事件影響，賣晒會搵其他貨取代。

更多港聞