部分選委自稱「奶粉」「薯粉」

[2016.12.13] 發表

【明報專訊】有資格選出下屆特首嘅1194名選委會委員名單正式出爐，800多名建制派選委亦開始盤算支持邊個參選人，其中人稱官場「奶媽」嘅政務司長林鄭月娥同人稱「薯片叔叔」嘅財政司長曾俊華係部分選委嘅心水選擇。有政圈中人同Emily講，已經有一啲選委笑稱自己係「奶粉」，即林太嘅粉絲；另一派就笑稱自己係「薯粉」，即係撐財爺。

話說早年有啲局長先後喺自己政策範疇上觸礁，林太要出嚟「照顧住」啲局長，於是「好打得」嘅佢多咗個「奶媽」稱號。咁究竟建制陣營入面，邊啲係「奶粉」？邊啲係「薯粉」呢？由於自由黨榮譽主席田北俊已經公開撐財爺，加上財爺崇尚「積極不干預」原則，相信「大市場、小政府」，因此有政界人士相信，一批商界選委會陸續加入撐曾行列，成為「薯粉」。

另一邊廂，邊啲選委會成為「奶粉」則有變數。有熟悉林鄭月娥嘅新任選委同Emily講，因為支持佢延續梁特首嘅「穩中求變」施政，待林太一宣布參選，部分「梁粉」就會變成「奶粉」以示支持。不過，梁營內部有唔少人其實係梁振英親密戰友，與林鄭月娥並唔熟，該選委分析，林太若參選，係咪招攬梁粉其中一個考慮，係會唔會太偏重揀梁營舊部，以免被標籤為「梁振英第二」，成為非建制攻擊矛頭，故最終有幾多「梁粉」會做「奶粉」，仍有待觀察。