【明報專訊】有網民喺facebook群組「荃灣友」呼籲，話荃灣沙嘴道一間士多嘅店主患癌，急於散貨籌集醫藥費。Emily噚日就去同店主妻子方太傾過，佢話丈夫兩個月前驗到患末期前列腺癌，急需籌錢應付醫療費，於是決定減價促銷。佢仲託Emily感謝網民嘅呼籲，又話希望喺出年4月租約到期前，搵到人頂手續租舖位。 屹立荃灣23年 見證街坊成長 方太同Emily講，丈夫身體一直都無大問題，「之前無乜病痛，係有時腰骨痛，但四五十日前出報告，話係末期前列腺癌，好意外，諗都諗唔到」。方太話結婚後就同丈夫喺沙嘴道296號地下合力經營「生記士多」，至今已經23年，見證住唔少街坊成長，「(客人)由細幫襯到大，好多都搬走晒啦」。 租約將到期 盼有人接手 丈夫患病後，方太決定盡快賣清店內存貨，包括紅酒、煙草及飲品等，「如果有心人想買多啲，可以平價賣」。佢話出年4月舖頭租約到期，希望有人可以接手，佢亦願意將貨品低價轉讓。對於有網民呼籲街坊幫襯，佢非常感激，又話親戚都有幫忙籌集醫藥費，「大家有心，唔使擔心」。
|
| |
| |
;){kind=small}
