「蕩婦遊行」促查康橋事件

[2016.10.31] 發表

【明報專訊】近百人噚日參與「香港蕩婦遊行(SlutWalk)」，要求捍衛女性權益，以及保障殘疾院舍人士免受性侵嘅基本權益。有參與女士憶述，曾因著短褲而被人打量，甚至被要求「快啲返屋企啦！」佢希望社會唔好以衣著去標籤女性。

遊行由團體「香港蕩婦遊」主辦，今年嚟到第5屆，隊伍由中環遮打花園起步，去到蘭桂坊。佢哋高舉「唔好教我點著衫，教下啲人咪強姦」等標語，要求保障女性權益。遊行發言人鄧美晶話，希望藉此反駁社會上責備強姦受害人嘅文化，同埋宣揚身體方面如衣著嘅自主權。遊行發起人曹文彩批評，社會對殘障人士嘅保障唔夠，康橋之家事件就係例子之一。團體要求政府成立獨立調查委員會調查康橋之家性侵案。

喺非牟利團體推廣性教育嘅姚小姐就話，佢試過喺香港著短褲出街，上身著樽領衫，備受朋友或途人打量，仲畀人話「哇，你咁都出街嘅？快啲返屋企啦！」佢覺得唔應該從衣著標籤女性。

SlutWalk運動喺加拿大開始，源於一個警務人員一句「女性不想成為受害人，應避免衣著似蕩婦」。2011年喺多倫多舉辦第一個SlutWalk後，運動擴展至多地，包括洛杉磯、倫敦等。