選戰前夕 樹根歐遊𧨾老婆 謝偉俊白姐姐拍片放閃

當立法會候選人忙於落區拉票，民建聯鍾樹根就選擇同老婆去巴黎慶祝太座生日，並拍短片曬恩愛。（鍾樹根facebook片段）

謝偉俊同老婆白姐姐拍片分享感情事，兩個都唔認主動追求對方，白姐姐就笑言係「自動獻身」，阿Paul形容白姐姐係佢生命中嘅幸運星。（謝偉俊facebook片段）

【明報專訊】距離立法會選舉投票日不足一個月，候選人出力拉票，「決戰前夕」，出戰港島嘅民建聯張國鈞名單、排第二位嘅立法會議員鍾樹根，就抽空與老婆歐遊，去法國巴黎慶祝太座生日及買禮物，實行「戀愛至上」。

樹根巴黎同老婆慶生

鍾樹根噚日喺facebook上載長44秒嘅自拍短片，片中見佢同「老婆大人」頭貼頭放閃，又讚歎巴黎「嘩，呢度周圍好犀利，都係好多名店，所有店舖都百幾年歷史」。樹根未有透露送咩生日禮物畀太太，但多次提及「希望𧨾吓佢(老婆)開心啦。做人係咁㗎喇，你話係咪？」喺選戰期間去歐遊，唔通佢已放棄拉票？唔知張國鈞見到黨友咁梳乎，會唔會為選情擔憂呢？

Paul：白姐姐係「幸運星」

除咗樹根，參選九龍東嘅謝偉俊(Paul)亦同「白姐姐」白韻琹拍片曬恩愛放上fb。Paul形容每個人生命中都會有一位「幸運星」，佢嘅就係白姐姐。然後兩人大談感情事，問到兩人點樣認識，白姐姐話「咁不幸嘅事」唔記得，Paul就透露於1989年9月，目前已係資深大律師嘅馮華健以及Paul嘅師父廖長城約佢去睇電影首映，又約埋白姐姐去，兩人就識咗。

至於對方有咩優點缺點，阿Paul話白姐姐優點係成熟，缺點係都幾黐身。白姐姐就讚阿Paul靚仔、肯幫人，缺點係做嘢拖泥帶水喎。

立法會候選人名單見附圖。。

更多港聞

李慧琼對談 請曾鈺成食薯片

【明報專訊】民建聯主席李慧琼（Starry）噚日搵咗民建聯創黨主席、立法會主席曾鈺成喺該黨總部搞對談節目，唔知係咪想借曾主席最近嘅高人氣幫手... 詳情

英領事下周四facebook Live 網民多嘢問

【明報專訊】上月卸任嘅美國駐港澳總領事夏千福之前喺facebook做直播訪問，同網民妙問妙答；英國駐香港及澳門總領事吳若蘭（圖）最近亦喺「U... 詳情

中電出教材套派全港幼園

【明報專訊】環保教育要從小做起，中電係能源公司，都幫手推動節能教育，製作咗一套以電力為主題，集故事書、兒歌及桌上遊戲於一身嘅幼稚園教材套《看... 詳情

立法會選舉候選人（部分）

【明報專訊】本報今日報道立法會相關新聞，涉及的選區或界別候選人名單如附表﹕（見表） 詳情