告別立會 民記元老收禮物 卿姐保證著吊帶

民建聯多名元老離任，黨友向陳鑑林（左二）、曾鈺成（左三）、譚耀宗（左四）及葉國謙（右一）送上禮物。（楊凱力攝）

民主黨主席劉慧卿噚日一身搶眼鮮黃色衣著，手執多年前嘅宣傳單張回顧議會生涯。卿姐話黃色代表希望，相信未來同大家後會有期。（鄧宗弘攝）

人民力量陳偉業立法會臨別依依，走去保安部「踩場」，同以往抬過佢離場嘅保安人員告別，仲講笑話想調轉抬番保安員一次，但未能成事，反被保安人員抬多佢一次。

【明報專訊】今屆立法會噚晚深夜謝幕，一眾會告別立法會嘅資深議員噚日有唔少搞作。民主黨單仲偕派玫瑰花；工聯會陳婉嫻就請大家食散水餅。唔少元老級議員都會退下火線，離別將至，立法會主席曾鈺成大嘆對未來生活感到好茫然；民主黨主席劉慧卿就話會揀個最爆時刻、兼有電視台直播時，再著當年做記者時著過嘅吊帶裙畀大家睇，保證唔會走數喎。

曾鈺成噚日見記者總結今屆立法會時，話本來準備好噚晚休會時發表感言，話擔任主席嘅時刻係「好高榮譽同享受」。不過，曾主席話立法會拉布拉到咁，個議會氣氛都唔容許佢講啲咁開心嘅說話。

曾主席又話，多年主席生涯非常有規律，星期一至六每日7點半返到立法會；星期日同細佬飲完茶就又返立法會工作。日前話對於參選特首要「拭目以待」嘅佢，講到卸任後嘅生活都覺得好茫然。

做咗四分一世紀議員嘅卿姐就話，會唞唞先，之後再決定做啲咩，又話無咩唔捨得，「我向前看，唔會擰返轉頭睇」。卿姐話過嫁咗畀香港，唔做議員會唔會搵個伴陪吓自己？佢大笑話「睇吓啦，隨緣啦」。卿姐又話，噚日臨別議會都好傷心，因為有3條民生草案卡住唔可以通過。

大嚿向保安挑機失敗 再被抬走

大嚿陳偉業都應該會退下火線，佢近年喺立法會內經常同秘書處保安部嘅同事交手，往往被抬離場。佢噚日決心去保安部踩場，抬返保安員一次，以報一戰之仇，只可惜失敗咗。結果，保安部同事合力示範抬人走技巧，將佢抬起。難怪大嚿自嘲話，退休後應該唔適合做保安。