林鄭請工聯食飯 唔講選舉講領展

林鄭請工聯食飯唔講選舉講領展

[2016.07.12] 發表

【明報專訊】今屆立法會即將結束，政務司長林鄭月娥、財政司長曾俊華近日分別約建制政黨食飯，究竟只係交流定有其他目的，只有當事人先知。而林鄭噚日中午就同工聯會幾個議員食飯，工聯會黃國健同Emily講，席間當然無談及特首選舉事宜，主要係講吓領展。

可能因為工聯會唔少地區都屬基層選區，所以特別關心領展，工聯會當然要追吓數，林鄭就同佢哋講，暫時已經喝停領展分拆商場出售，直言如果領展要賣，就要面對打官司。林鄭又話，早前同領展嘅人見面時，已表明政府願意搵地興建街市，以及喺舊屋邨做地舖，兩者都係要製造競爭，不過興建街市，前提係該區有需要，政府亦搵到地。

工聯落晒區無人投票被諷

工聯會噚日都好忙，財委會就一度無人在席，結果喺表決勞工處申請延長支援標準工時委員會餘下工作、同跟進工時政策方向等相關工作嘅職位5年時，工聯會無人投票。本來唔係咩大件事，最弊係工聯會榮譽會長陳婉嫻喺上周五財委會審議有關項目時，表明工聯會會反對。工聯會無投票被視為「走數」，工黨隨即製作短片，批評工聯會講就兇狠、企喺工人對面等。

黃國健就解釋，選舉臨近，幾個議員全部落晒區工作，嫻姐亦去咗深水埗開記者會，結果出現無人投票情况。