費Sir肥安有冇得諗？
英軍想贏怕輸礙發揮
柏高今期開宗明義講廢話，不過如果有耐性繼續睇下去，都可能有些啟發。英格蘭一如所料又要換教練，目前大部分的所謂候選人睇見唔開胃，那不如跳出框框。如果，即係零機會發生的如果，可以的話，惟有費格遜出山，或安察洛堤自殺式未履新已離開拜仁慕尼黑，才有機會立即打救英軍。
顧慮太多 落後頓失準
先看看謝拉特感同身受的一番評論。「當英軍落後，大部分隊員已想着敗北的後果，這思緒在腦中的比重跟希望扳平一樣多。我討厭這樣說，但大家在比賽中的焦點，已轉向回家時的報道會是怎樣、自己將受到何種程度的抨擊。恐慌萌芽、沮喪主導，球員被凍結了，停止去做明知該做的事，錯誤抉擇開始出現。因着焦慮，使簡單動作也辦不到。」
為何柏高特別提到上述謝老四之言？因為關於英軍技術水平和鶴臣戰術調動，經過兩三日已聽/看了很多/太多，卻似乎無甚輿論講及英軍表現出來的心態，尤以最後15至20分鐘，發揮之差達到反常級別，本該拚死無大害勇於冒險，實際更見縛手縛腳不知如何是好，結果就讓初生之犢的拉舒福特正正由於大無畏，反而短短幾分鐘的數據已勝過全隊一眾老大哥。
簡單一句，想贏怕輸，綜合了英軍不敵冰島、今屆歐國盃、在鶴臣麾下，甚至過去好多年的演出。當中固然有球員質素唔夠班的日子，惟絕大多數時間就是壓力太大自視過高放不開。於是就回到文首的廢話。英軍最急需的，恐怕並非頂級國腳或戰術大師，而是救心。
英軍需要救心大師
講到激勵部下，有誰比費爵爺更勁？雖然他如今閒雲野鶴，蘇格蘭又話再搞獨立公投，但要他兼職幫手頂兩年，有冇得諗？
費Sir唔得，不如考慮用盡一切金錢人脈向肥安挖角。忠實讀者肯定知道柏高向來對肥安評價很高，尤其是畀乜人佢用都同你度得掂，而且極具魅力，善於凝聚球星大佬。唯一問題是似乎只能短線應急，幫不到英格蘭足總的長遠育才大計。不過有得畀柏高揀，梗係要剎那光輝，好過只有未來沒有現在啦！
