【明報專訊】商務及經濟發展局長蘇錦樑去咗英國倫敦訪問，到唔少地方考察，包括參觀市內美食車嘅營運模式。佢話政府早排提出引入美食車，並擬訂美食車先導計劃，計劃由3月31日開始接受申請，截止日期5月30日。蘇錦樑噚日仲去咗參觀正喺倫敦舉行嘅Alchemy文化節，感受當地文化創意氛圍，話可以探討一下點樣借鏡倫敦發展文化創意產業方面嘅經驗及成功因素。

蘇錦樑又去過當地唐人街，仲學人拍訪問片段，介紹當地華僑代表用咗10年籌劃，啱啱喺唐人街豎立嘅牌坊，讚賞當地華僑團結。佢嘅行程仲包括到訪單車製造商Brompton Bicycle Company，呢間製造商自1975年起設計同製造摺疊式單車，年產量超過4.5萬部，係英國最大規模嘅單車製造商。