【明報專訊】財政司長曾俊華上月發表財政預算案，派糖300幾億，仍然有聲音批評財爺係「守財奴」。財爺噚日喺港台英文節目《給香港的信》，就話自己亦幻想過「烏托邦」式嘅理想世界，但當入到大學修讀公共行政，就更加專注喺可能性、負責任嘅管理，同謹慎嘅公共財政，而教授亦教曉自己，政客可以用「烏托邦」願景嚟催眠大眾，但政府就唔會參與其中。
談旺角事件 冀「停一停諗一諗」
不過，財爺話經過30幾年嘅公共行政經驗，明白除咗講實際，亦要有一啲理想主義，所以制訂今年預算案時，時刻提醒自己要減輕社會負擔，為未來提供更廣闊機會，同時實踐建設包容社會嘅承諾。
財爺又不點名重提旺角大衝突，話希望每個人都可以「停一停、諗一諗」，思考點為下一代構建香港，社會需要改善溝通同解決矛盾，重返以往共享嘅價值、禮貌同理性，亦要重燃對自己家園嘅愛。面對矛盾，財爺覺得無嘢係唔能夠解決，只要有決心就可以，而愛亦會令我哋渡過難關(Love will see us through)。
