【明報專訊】香港紅十字會噚日舉行新總部開幕典禮，特首梁振英(CY)致辭時話自己一直係「頻繁捐血者」，嗰時會好驕傲咁每日戴住個滴血形狀嘅襟針。佢又話可能紅十字會覺得佢幾「順得人」、幾積極，叫佢去葛量洪醫院做heart-beat donor，捐血畀一個當日要做手術嘅病人。

CY大讚紅十字會嘅人道關懷同志願精神，好配合今屆政府扶貧、安老、助弱嘅施政，又不忘提番過去3年多，政府制訂貧窮線、長津同低收入在職家庭津貼等，福利方面嘅開支加咗40%。

煲呔伉儷出席

香港紅十字會1950年成立，金鐘舊總部運作咗超過50年，可用嘅空間已經飽和，政府批咗西九龍海庭道畀佢哋重建總部，主席羅榮生喺典禮上點名多謝時任發展局長林鄭月娥拍板批地。紅十字會為咗重建籌到4億，新總部舊年9月建成，樓高11層，設有全港最大捐血站、人道教育中心，同備有實習場地嘅急救及健康護理訓練中心等。

開幕禮星光熠熠，政務司長林鄭月娥、勞福局長張建宗、食衛局長高永文，連好少露面嘅前特首曾蔭權同太太都有出席，不過佢哋冇答記者問題就走咗。