【明報專訊】勝出新東補選嘅公民黨楊岳橋(岳少)明日就會喺立法會宣誓做議員，作為議會新丁，岳少話雖然有前輩協助，但心情都有啲戰戰兢兢，噚日朝早已經去拜會立法會秘書長陳維安。聽日岳少就會開始參與審議《2014年版權(修訂)條例草案》，佢話願意喺會議上提供法律觀點同理據；至於會唔會獻出點人數嘅「第一次」？岳少話呢啲策略當然係團隊合作去做。

參與審議版權例

周六及周日因為要拉票，岳少總共只係瞓咗個半鐘，噚日當選後，佢一早就要出席電台節目，之後開記者會，隨後就去謝票，夜晚再出席電視台節目。Emily呼籲岳少去立法會開會前一定要好好休息，皆因到時所有鏡頭都會對住佢，被人影到喺議會恰眼瞓就唔係幾好啦。

自言「貪靚」嘅岳少，落區拉票都堅持時刻打呔、著皮鞋，一絲不苟，佢噚日出席商台節目《在晴朗的一天出發》時，被問到咁嘅行頭，會唔會影響日後喺立法會嘅抗爭行動，岳少笑住話自己啲西裝都係cheap嘢嚟，唔妨礙工作嘅。

Emily噚日趁公民黨記者會時，問過岳少啲西裝cheap到幾錢，不過岳少只係笑笑口，死都唔肯講。