田二少走音歌諷CY 林鄭笑咗
【明報專訊】立法會開足3日會,辯論《施政報告》致謝動議。講嘢都未夠,新民黨副主席田北辰噚日喺總結陳詞仲一展歌喉,即場唱咗兩句Bob Dylan嘅經典歌曲Blowing in the wind送畀特首。
不過田二少淨唱得一句「How many times can a man turn his head, and pretending he just doesn't see?(一個人可以有幾多次擰轉面當睇唔到?)」就停咗,佢笑住話「噚晚瞓得唔好,把聲沙沙哋」,搞到在座嘅官員,包括政務司長林鄭月娥都忍唔住笑。
雖然田二少唱得有啲走音,不過歌詞表達嘅意思就好簡單,佢質問CY係咪繼續扮睇唔到社會矛盾,「或者真係諗一諗有乜嘢可以做呢?」
譚志源質疑歌詞斷章取義
政制及內地事務局長譚志源就唔多畀面,佢最後發言就話多謝田二少憑歌寄意,但話佢將首歌「斷章取義」,指呢首Blowing in the wind係60年代反戰嘅歌,主要係宣揚愛與和平信息。
其實,立法會聲沙嘅議員唔單止係田二少一個,仲有病到失晒聲嘅工聯會麥美娟,如果唔睇畫面,Emily淨係聽聲仲以為係個男人講緊嘢。不過麥美娟噚日唔理醫生勸告堅持發言,話要為保障個人私隱問題同少數族裔不平等待遇發聲。