邀素姬訪港 卿姐食檸檬

立法會議員民主黨劉慧卿（右）、獨立謝偉俊（左）獲聯合國發展計劃邀請到緬甸，仲同當地民主派領袖昂山素姬（中）見面，大家難得交流。（劉慧卿提供）

【明報專訊】民主黨劉慧卿同獨立謝偉俊，早前獲聯合國發展計劃邀請到緬甸交流。卿姐出發之前已極之期待，希望可以同緬甸民主派領袖昂山素姬見面，呢次終於如願以償。卿姐話，昂山素姬前日邀約外國議員傾談大約半個鐘。卿姐大讚昂山素姬係女強人，話對方好清楚自己想做咩，睇法好清晰同果斷。佢話，昂山素姬唔單止好了解自己嘅黨友同國家，仲可以清晰講出有咩可以選擇、咩唔得。謝偉俊亦大讚昂山素姬「真人比照片更有氣質」，其溫柔語氣中充滿剛強、智慧。

謝偉俊讚真人靚過上鏡

昂山素姬喺會面時話，希望緬甸嘅議員加油，雖然佢哋好窮，無辦法同其他國家相比，當中好多議員更加嚟自落後村落，其中一個嚟自山區嘅議員要步行13日先可以去到選區，但昂山仍然希望佢哋可多啲探訪選民。卿姐亦表達咗支持，希望緬甸可踏上民主之路。難得能夠面對面交流，卿姐當然把握機會，趁機約昂山嚟香港，但對方就講明最近非常忙碌，要先應付下月嘅總統選舉工作。

更多港聞

動玩博覽會展開幕 頭位排咗3日

【明報專訊】Emily噚日去咗會議展覽中心，睇吓一年一度嘅「C3日本動玩博覽2016」，今年有超過60間嚟自日本同香港嘅參展商參與，數量多舊... 詳情