【明報專訊】教院決定頒發榮譽院士畀6位傑出人士，包括故事被搬上大銀幕嘅「5個小孩的校長」呂麗紅，同埋正生書院校長陳兆焯，仲有鳳溪公立學校行政總裁馬紹良、甘迺迪中心前校長謝宗義、煤氣公司常務董事陳永堅同DHL創辦人鍾普洋，4月7號會舉行頒授典禮。

教院讚揚呂麗紅充滿熱誠，係幼兒教育界嘅楷模，諗住提早退休時知道元岡幼稚園嘅困境，毅然決定應徵做全港最低薪酬嘅校長，同埋成功改革幼稚園，令學生由5人增加到60幾人。教院又話，陳兆焯創辦正生書院，係香港唯一一間以濫藥青少年為對象嘅中學，過去15年仲走訪咗350間中學同250間機構，向超過13萬人宣傳濫藥危害。做過教育局首席教育主任嘅馬紹良，就喺2000年為政府創辦咗教育城，將資訊及通訊科技融入教學，佢旗下一間小學仲被選為微軟公司「未來學校計劃」全球12個伙伴成員之一。