拒答撐唔撐CY連任 總商會彭耀佳﹕我唔代表全商界

拒答撐唔撐CY連任總商會彭耀佳﹕我唔代表全商界

[2016.01.26] 發表

【明報專訊】近日天氣寒冷，香港總商會噚日就再向打工仔吹冷風。總商會主席彭耀佳噚日同傳媒聚會時就話，會員都擔心金融市場表現唔理想，加上訪港遊客數字下跌，會令今年經營環境變得困難，佢自己預計今年失業率可能上升(現為3.3％)，總裁袁莎妮亦話，相信今年企業加薪幅度保守喎。總商會對前景睇得咁灰，唔知係咪預示一眾打工仔今年都會「被同舟共濟」呢？

看淡今年經濟失業率或升

特首梁振英(CY)早前發表《施政報告》，隻字未提取消強積金對冲，商界都好啱聽。彭耀佳被問到CY咁聽商界聲音，會唔會支持佢連任，彭就帶Emily同一眾行家遊花園，話CY無提對冲議題唔代表「聽晒商界話」，商界有好多訴求施政報告都無回應到，又話自己只係商界其中一個人，代表唔到成個商界，最終講咗一輪都係唔肯表態。咁對嚟緊嘅財政預算案有咩期望呀，彭耀佳就話總商會會員來自各行各業，難以用單一期望涵蓋晒佢哋意見喎。

另外，香港總商會早前用咗大約1000萬元翻新金鐘總部，當中最有趣嘅新擺設，莫過於由16幅黑白照砌成、象徵總商會超過150多年歷史嘅「歷史牆」。總商會喺1861年成立，歷史牆當然有唔少得「戀殖」相片，包括喺1884年出任總商會首屆立法局代表、英國銀行家昃臣嘅個人照。總商會亦貼咗唔少同前任國家領導層嘅合照，包括前國家主席江澤民同前總理溫家寶。