大姐大手記：台慶頒獎禮平淡 張繼聰視帝黑馬 阿田煒哥有得鬥
【明報專訊】《萬千星輝頒獎禮2015》周日(13日)舉行，若果唔係有人提醒，大姐大幾乎唔記得頒獎禮舉行日期。不禁又要想當年，過往台慶頒獎禮雖然明知是自己友選舉，但作為觀眾都好肉緊，欣賞到好劇集自然希望支持的劇集與演員有佳績，起碼證明自己有眼光。還記得2009年播映前唔起眼的《巾幗梟雄》在年中爆出來，當時陳志雲還在任總經理，大姐大跟眾行家已圍住志雲，話視后若果不是鄧萃雯就柴佢台。今年的頒獎禮，大姐大就嫌平淡，整整一年有好多劇集播映，但真正「爆」出惹話題的又有多少部？
幾年前TVB讓觀眾參與投票增加投入感，2012年的最佳劇集與男女主角(即係《天與地》、黎耀祥與楊怡)是完全由觀眾投票話事選出來的，但後來轉投票基制，有「TVB委員會」、職藝員的投票，就是遊戲一場。
「TVB委員會」是誰？
今年又有不同的玩法，重要獎項「最佳男、女主角」、「最受歡迎電視男、女角色」、「最受歡迎劇集歌曲」及「最佳劇集」是觀眾與「TVB委員會」投票選出。至於男、女配角、飛躍男女、綜藝節目、最佳節目主持、最佳綜藝節目與最佳資訊節目則由「TVB委員會」與全台職藝員所選；觀眾唯一全權話事的只有「最受歡迎經典劇集」。究竟「TVB委員會」是誰？成員有幾多人？投票所佔比率？這些問題一向沒公布，就是不要問，只要信了！
陳展鵬大熱 秋生超班
今年男、女主角之爭又點睇呢？陳展鵬憑《張保仔》已連奪新加坡視帝與大馬視帝，他的粉絲也落力拉票，但各有所好啦！
大姐大覺得《收規華》的張繼聰好突出，還有《梟雄》裏馬國明、超班的影帝黃秋生，所以大姐大要投黃秋生一票！
胡定欣稱職 阿田好戲
女主角方面，田蕊妮跟胡定欣雙雙成為大馬視后，多年來胡定欣很努力工作，演出也稱職，但論戲，大姐大睇《鬼同你OT》是被阿田吸引追住睇，偏心都要講句﹕ 「我愛孫淑梅！」其實《梟雄》裏陳煒演的桂生姐很耀眼，論實力，煒哥絕對有心有力的，好難揀！
陳山聰黃心穎男女配角熱門
以上個人喜好的揣測，大姐大都有做功課，向有份投票的TVB職藝員八卦。男配角方面，陳山聰今年共出了5部劇， TVB明顯給機會，表現不錯，他憑《張保仔》爭男配角，看來有機會。女配角以黃心穎是熱門之選，有觀眾緣佔優。飛躍進步男藝員洪永城被睇高一線，至於飛躍女藝員若不選陳凱琳又揀誰呢？其實都無敵手了。
期侍四哥曾江齊上台領獎
大姐大最期待的畫面是頒最佳主持與最佳綜藝節目，今年論話題與娛樂性，《4個小生去旅行》真係無得輸，若果見到四哥跟曾江齊齊上台領獎，你話大家幾開心呢！
