歐元跌遊艇平咗幾十萬有交易

【明報專訊】噚日喺西貢有個國際遊艇展，Emily去採訪感受下呢類富豪消費品嘅巿况。噚日起一連3日、由西貢匡湖遊艇會舉辦嘅香港國際遊艇展，有37隻遊艇展出，售價介乎幾十萬到數千萬港元，最貴個隻開價711萬歐元，即大約6000萬港元，對Emily呢啲仲係諗緊點上樓買格階磚嘅打工仔嚟講，呢個消費巿場有啲仙境感覺。

Emily現場所見，有46個參展商參與遊艇展，有參展商講起近來歐元大跌，反而令遊艇銷情向好。遊艇代理商董事總經理胡禮賢同Emily講，遊艇售價以歐元計，就算香港市道麻麻，但因為遊艇價錢平咗，所以睇好銷情；佢又話客人以香港人為主，但亦有參展商透露多咗「新香港人」即取香港居留權的內地人買家。雖然睇好銷情，但有銷售經理就呻政府咁多年無改善過遊艇泊位唔夠嘅問題，搞到有啲遊艇泊去避風塘而畀船家投訴。

現場有隻Tiffany Blue顏色、由意大利Absolute出品嘅Navetta 58遊艇非常搶眼(圖)。佢唔單止靚，仲好實用，艇前有個大梳化位同曬太陽位，不過Emily就得個望字。胡禮賢話實在太搶手，就算𠵱家訂，最少都要等年半先有！