刊物點評7司局長 大輝「豎拇指」讚財爺
[2015.10.20] 發表
【明報專訊】工業界立法會議員林大輝批評特首梁振英時，一向好少忌諱，近期佢就印製咗一本題為「政壇風暴 波譎雲詭」嘅刊物，點評梁振英同幾個司局長嘅表現。林大輝不點名咁話，特首早前喺無「合理解釋」下撤換兩個局長，係「引火自焚」，而市民對政府嘅信任同時不斷下降。
特首不能「無能無德無民心」
講到心目中嘅特首人選，林大輝話下屆特首一定要有自知之明，唔可以「舢舨充炮艇」，要得到市民支持，先會得到中央嘅祝福。佢又話中央「絕對不能容忍」一個「無能、無德、無民心」嘅人做特首，而特首係中央同香港嘅橋樑，但如果呢條係一條「爛橋」，就只會令兩地關係更差。句句到肉。
刊物入面嘅「問責官員巡禮」同樣精彩，喺7個被評價嘅司局長入面，只有財政司長曾俊華獲得林大輝「豎拇指」讚好，話佢最近同國家主席習近平握手後「人氣急升」，但當務之急係要防止經濟下滑。
指吳克儉鉛水風波反應遲鈍
林大輝又話，教育局長吳克儉喺鉛水風波「反應遲鈍」；商務及經濟發展局長蘇錦樑喺Uber事件就「耍太極」。佢亦都寄語民政事務局長劉江華，話佢如果只識「明哲保身，不敢勇於承擔」嘅話，就必然會受社會指摘咁話。
更多港聞
【明報專訊】民建聯嚟緊一個月將會舉行3場「圓桌會議」，探討宏觀經濟、房屋、醫療同福利政策，請嚟唔少政商界人物做嘉賓，包括有傳係下任特首熱門人...
詳情
【明報專訊】相信大家都知香港曾經係一個漁港，漁業盛極一時，香港仔嘅漁業發展更加係歷史悠久。香港大學「同行計劃」將於下年3月喺赤柱社區會堂舉辦...
詳情
相關新聞
