民建聯圓桌會 請阿松做嘉賓
【明報專訊】民建聯嚟緊一個月將會舉行3場「圓桌會議」,探討宏觀經濟、房屋、醫療同福利政策,請嚟唔少政商界人物做嘉賓,包括有傳係下任特首熱門人選嘅前財政司長梁錦松、中原集團創辦人施永青,同置地控股CEO彭耀佳,星光熠熠。幾場會議喺北角民建聯總部舉行,佢哋邀請埋前民主黨員、𠵱家成立咗參政平台「新思維」嘅狄志遠同黃成智做嘉賓。
並邀狄志遠黃成智
梁錦松近期頻頻曝光,有記者就問民建聯主席李慧琼(Starry),係咪因為梁錦松有可能問鼎特首一職,所以邀請佢講「治港藍圖」?Starry話未諗過呢個問題,但就唔知有無語帶相關,形容梁錦松近期都「好活躍」。
講到特首選舉,Starry話黨內有討論取消強積金對冲呢個焦點議題,但暫時未有共識。
Starry話希望喺3場「圓桌會議」後,整合各個嘉賓嘅意見,交畀政府參考,令《施政報告》公布前可以有多啲共識。佢話民建聯都邀請咗「民主思路」召集人湯家驊同民主黨李華明出席,湯家驊未有回覆,李華明就拒絕咗。
李慧琼喺今屆區選出選土瓜灣北,同區參選人有沈泰鋒同林依麗。