睇選民冊 搞錯「種票」指控 民主黨記招變道歉會

[2015.09.26] 發表
民主黨總幹事林卓廷喺開記者會講「種票」嘅最後一刻,發現指控有誤,即刻勒住唔講選民登記,幸好無怪錯選民,唔係就大件事。(鍾林枝攝)

【明報專訊】選管會噚日公布咗正式選民登記冊,一直好關心選舉公平嘅民主黨總幹事林卓廷,噚日即刻對比臨時同正式登記冊嘅資料,發現有臨時登記冊嘅「問題選民」,喺正式登記冊上集體「搬咗屋」,好似相當有嫌疑!

發現「選民集體搬屋」

民主黨即刻發咗個「緊急採訪通知」,話「發現懷疑有組織種票」。點知Emily同一眾行家身水身汗趕到去記者會,林卓廷就話「要同大家致歉」,原來佢哋資料有錯,記者會搞唔成。

格式移位致原始資料出錯

原先嘅採訪通知話,民主黨發現喺臨時登記冊已經證實,唔係住喺石湖墟唐樓嘅選民,喺正式登記冊搬咗去同區其中兩個屋苑,仲有3個原本同住嘅選民1拆3登記咗3個地址,如果係事實,咁真係好可疑。

阿廷道歉最少6次

不過,阿廷最後一刻發現指控有誤,即刻勒住唔講選民登記,佢同到場記者最少道歉咗6次,解釋發出採訪通知前已再次核實資料,但發出通知後,先發現資料「唔多啱咁」,於是佢再查核,先發現佢哋應該係用電腦處理資料時,人名同地址格式移咗位,令到原始資料都出錯,令核實時都發現唔到。阿廷總算有膊頭,話今次係「我嘅責任」,唔會卸落同事度。

不過,阿廷今次都算好彩,因為向記者道歉事小,但如果用咗唔準確資料,怪錯選民種票,咁就真係大件事,到時道歉都救唔番。

更多港聞
【明報專訊】渣打香港馬拉松2016嘅全馬賽事噚日朝早7點開始接受報名,短短兩個幾鐘後,香港業餘田徑總會就宣布,首階段接受報名嘅15,500個... 詳情
CY出席新聞界國慶酒會
下周四係十一國慶,唔少團體陸續舉行慶祝國慶嘅酒會或其他活動,無「去中國化」!新聞界亦唔例外,噚日舉行國慶66周年酒會,特首梁振英(前排右五)... 詳情
【明報專訊】民協或會喺出年第一季選新主席,現任副主席譚國僑同Emily講,話主席馮檢基(阿基)到時未必會冧莊,佢自己就有考慮參選,有黨友支持... 詳情
【明報專訊】嶺南大學噚日同傳媒茶敘,新上任嘅嶺大副校長莫家豪透露,由2016至2017年度起入學嘅學生,需要修讀至少一個有服務研修嘅學科,即... 詳情

明報網站 · 版權所有 · 不得轉載
Copyright © 2015 mingpaocanada.com All rights reserved.
Ming Pao Daily News A wholly owned subsidiary of Ming Pao Enterprise Corporation Ltd.
Vancouver Chinese Newspaper

5368 Parkwood Place, Richmond B.C. V6V 2N1 | Tel.: (604) 231-8998 | Fax: (604) 231-9881/9884 | Advertising Hotline Tel.: (604) 231-8992