張宇人爭內會主席拉票 葉劉投票 先問政府

張宇人爭內會主席拉票葉劉投票先問政府

[2015.09.14] 發表

【明報專訊】自由黨張宇人日前突然殺出嚟話要爭立法會內務委員會主席，挑戰經民聯嘅梁君彥，仲已經開始拉票，至今大部分建制派都未公開表態，包括新民黨主席葉劉淑儀。葉太噚日接受商台訪問時，承認已收到張宇人拉票電話，至於到時支持邊個，葉太就話會聽取特區政府意見，再決定投票意向。點解立法會內部選主席都要問政府意見呢？

葉太解釋，內會主席要同政務司長舉行工作會議，立會順利運作亦好重要喎，所以都要了解吓政府諗法。佢話認同張宇人能力令人佩服，但亦要尊重建制派既有協調機制。

葉國謙：一向議員自己討論

張宇人就話，自己出選就無問過政府意見喇，但佢早前亦公開講過，有就選內會一事向中聯辦提及。

負責協調建制派嘅民建聯葉國謙話，一向都係議員自己討論，派邊個出選，唔使問政府。民主黨主席劉慧卿就反駁葉太，「市民選你入立法會做咩呢，就係要監察。選邊個做主席，你都要問政府，咁喺立法會裏面，做其他重要表決，就更加要問，咁不如叫政府嚟做議員喇，使咩你坐喺度做(議員)？」

建制派早前聲言要搶盡各委員會嘅主席嚟做，甚至連內會副主席都唔放過，張宇人噚日接受電視台訪問時，就表明唔認同，話選主席時建制派鬥人多，之後又退出晒委員會係好難睇，咁做對大家都無好處，指解決問題要回歸協商。