馮煒光民主黨舌戰沒鉛沒了

[2015.07.17] 發表

【明報專訊】民主黨議員早幾日同特首梁振英見面，主席劉慧卿形容會面坦率、唔反感，更加超時𠻹，而CY噚日亦寫網誌形容「會面氣氛務實坦誠，有建設性」，佢更向民主黨示好，表明希望撰寫《施政報告》前再約見民主黨聽意見，亦歡迎民主黨隨時聯絡佢。

馮質疑為何拖兩個月公布

不過，新聞統籌專員馮煒光對待民主黨就有另一種態度，噚日喺facebook又質疑民主黨拖延公布「鉛水」。

公屋鉛水風波由民主黨率先踢爆，相信已拎到唔少分，但噚日馮煒光喺fb轉載一篇報道，入面提到民主黨5月已知問題，質疑點解要到7月先公布，馮煒光話「若真心為市民健康，為何坐住2個月？請解釋」，又「請黃碧雲議員站出來，面對公眾」。

民主黨反駁：點解政府唔知鉛水

民主黨成員見到，當然忍唔住同佢舌戰，南區區議員柴文瀚質疑點解政府唔知鉛水，「是否因為涉及中國大陸外判商問題而隱瞞？」不過無論民主黨成員講咩，馮煒光都重複要求黃碧雲解釋，柴文瀚雖然話民主黨會出稿回應，但馮竟然話「原來我有份創立的民主黨，變成不敢面對公眾和記者！不敢解釋！」中西區區議員黃堅成話，民主黨無變過，變嘅係馮專員。

新民主同盟陳惠達亦加入戰團，質疑點解該黨驗到水泉澳邨有超標，但政府至今仲無回覆，希望專員跟進吓，不過馮煒光就無再回覆喇。