野生捕獲球星放暑假
訪港遊日 陽光海灘各自精彩
[2015.06.24] 發表
球星放暑假，有人趁機拉埋天窗做老襯，有家室的當然把握時間陪妻兒，有的球星卻靠「騎呢」搶鏡，例如教狗仔游水、玩蛇，但對香港球迷來說，當然來港放暑假最好啦！近日先有「魔迷」地下鐵碰着他，在港鐵巧遇前曼聯門將雲達沙，今日就輪到多蒙特球迷出擊，睇睇有冇緣分野生捕獲中場大將根度簡。
雲達沙雖已退休，但難得來港，少不免「被集郵」，球迷紛紛上載與一代鋼門的合照，地鐵車廂有、運動用品專門店都有，甚至不少「粉絲」到酒店守候追星。雲達沙是次訪港純屬私人性質，並非為曼聯或阿積士宣傳。
至於另一來港度假的球星就是多蒙特中場根度簡。收咧後不久，這個轉會市場搶手貨便展開私人亞洲之旅，先遊日本，現場觀看「蜜蜂軍」隊友香川真司代表日本鬥新加坡的世界盃亞洲區外圍賽，之後去了上海，昨日南下抵港，將短留4天。
不過想野生捕獲球星，離開香港一樣有計。最近日圓急跌，唔少香港球員都趁暑假去日本掃貨，前港隊鋼門范俊業更在人頭湧湧嘅淺草寺外捕獲巴塞隆拿左閘佐迪艾巴。頭帶Cap帽嘅佐迪艾巴同場上一樣咁實而不華，少啲眼力都認佢唔到，而呢位西班牙國腳亦非常親民，逐一被「豬仔」及一班老友記「集郵」。
雲達沙被集郵 根度簡抵港
在地球另一端的西班牙伊維薩島，荷蘭的亨特拉爾、史奈達和尼祖迪莊同到此處享受陽光與海灘，史奈達更帶同小狗度假，甚至教小狗游水。利物浦的艾拔圖摩蘭奴亦在伊維薩島，他對動物同樣情有獨鍾，但玩的是一條10呎長的大蟒蛇，他還拿起蟒蛇纏在頸上，拍照上載到Instagram。曼聯中場費蘭尼也熱愛與陽光玩遊戲，他選擇美國邁亞密，不過當他玩完水上電單車時，頭上卻多了一堆海草，十分騎呢。
更多體育二
相關新聞
