「哈囉喂」banker副校扮鬼扮上癮
聘1200演員 時薪50至145元
[2015.06.17] 發表
【明報專訊】海洋公園「哈囉喂」年年都會請人扮鬼，今年請足1200個演員，最高時薪有145蚊，做導演月薪甚至超過4萬蚊。好多人扮鬼扮上癮，年年都會返嚟再扮過，當中唔少仲係專業人士，甚至有年過50歲嘅副校長，連續幾年哈囉喂都攞無薪假嚟扮鬼。
副校3年攞無薪假「回歸」
為咗迎接哈囉喂，海洋公園今年8至11月會請超過2000人，包括400個後台工作人員、600個前線後勤服務人員，同埋足足1200個演員，由鬼屋、街上啲鬼，到舞蹈員及體操運動員都有，演員時薪由50蚊到145蚊不等，視乎經驗同做咩角色，如做得好仲有人工嘅20%做花紅?；做到導演嘅話，月薪甚至可以超過4萬。
海洋公園演藝節目總監歐陽綺華話好多人扮鬼扮上癮，每年起碼有一半人返嚟再扮過，當中有醫生、精算師，甚至有月薪40萬嘅banker喎。營銷執行總監梁啟誠亦分享，話有間專業學院嘅副校長年過50，連續3年哈囉喂都會專誠攞無薪假嚟扮鬼，仲因為身材比較細粒，成日都扮駝背鬼。問到點解咁多人年年返嚟扮鬼，佢話好多人都覺得扮鬼嚇到人好有滿足感，又可以釋放工作壓力，而且可以識到好多朋友，每年哈囉喂都撮合唔少情侶㗎。
海洋公園禮拜日會喺荷里活廣場1樓搞「招魂大典」請人，安排即場登記同面試，有興趣嘅朋友可以帶埋履歷表同近照去應徵。演員導演許詠心提提大家﹕想做鬼嘅話最緊要係夠放同有表演慾。歐陽綺華都話曾經有應徵者一入門口就即刻跳舞，?到佢非常開心，但過去有人太投入，唔小心講咗粗口，就會即時被叮走。
更多港聞
【明報專訊】好快又七．一，為慶祝香港回歸18周年，解放軍駐港部隊將於7月1日開放昂船洲軍營同石崗軍營，歡迎市民參觀。究竟有乜嘢可以見識吓呢？...
詳情
【明報專訊】近10年最高端午頭獎彩金嘅六合彩端午金多寶噚晚攪珠，總投注額高達1億元，攪珠結果係13、16、24、26、40、44，特別號碼為...
詳情
相關新聞
