單仲偕做三人組主席
立會「超小圈子選舉」險難產
[2015.06.13] 發表
【明報專訊】現行嘅特首選舉經常被批評為「小圈子選舉」，但立法會一個法案小組，噚日就喺會議室上演一場「超小圈子選舉」。點小法？呢場主席選舉連埋選民同候選人，只係有委員單仲偕、張華峰(張老闆)同吳亮星(星爺)3個，提名階段候選人仲差啲「難產」。好彩，星爺喺危急關頭決定提名民主黨單仲偕，單仲偕又肯接受，呢個法案小組先避得過一場「憲制危機」。
呢個只有3名委員嘅委員會，叫《審議與場外衍生工具交易有關的三項附屬法例的小組委員會》，聽個名都知無乜人有興趣。
張華峰：可否和議自己做主席
開會前，要選出會議主席。最先被提名嘅係星爺，但單仲偕唔和議，張老闆一度問秘書，「咁呀，咁唔好和議得唔得呢？」又問「提議(人)和議(人)同一個人得唔得呢？」咁荒謬嘅建議點接受？點知張老闆繼續出招，問星爺可唔可以「和議」自己做主席。最終秘書ban晒呢3個建議。
面對主席難產，星爺好努力解決危機，「咁不如我提名張華峰先生呀！試一試呀！」但又輪到張老闆居然唔領情，話唔做主席。星爺揀到無得揀，唯有話「一係我提名單仲偕做主席啦」，單仲偕考慮咗一陣最終接受。但仲差個和議人喎！張老闆話：「和議啦，唔係都唔成㗎！」小圈子傾掂，3個人「眾志成城」，呢個委員會主席先順利「當選」。
更多港聞
【明報專訊】近日網上流傳一段題為《2020家書》短片，以「政務司長林鄭月娥」角度，分析通過政改後香港嘅轉變，片中「林太」對政改通過追悔莫及。...
詳情
【明報專訊】Emily聽過唔少新界北區同大埔嘅居民呻區內無戲院，特首梁振英喺施政報告都話要考慮預留空間發展電影院，不過工聯會鄧家彪（Bill...
詳情
相關新聞
