【明報專訊】1998年已經退下香港政治火線嘅新華社香港分社(中聯辦前身)前副社長張浚生，依然心繫香港，一講起香港仍然好好火，佢早前喺杭州接受特約記者楊柳訪問時，話英國喺香港「放釘子」，「其中最大的釘子，就是回歸前的政制改革。回歸後則與香港反對派配合製造事端，先有反對23條立法，令這個法案最後立不起來……還有就是國民教育」。 話英國喺香港「放釘子」 張浚生又講到自己喺香港有好多朋友，有次到前人大常委曾憲梓屋企拜訪，大家仲一齊高唱《沒有共產黨就沒有新中國》。 佢仲講到回歸前，話當年領導人鄧小平極具前瞻力，早估到香港回歸後會面對唔同方面嘅破壞力量，唔會無風無浪，所以中央唔能夠唔管。 每年來港幾次 好了解現况 張浚生每年都會到香港幾次，對香港最新情况都好了解，包括立法會「拉布」，佢話拉布唔止影響立法秩序，更嚴重係影響廣大港人嘅切身利益，影響香港繁榮穩定。佢以「中國講和諧，和為貴」，佢不在其位，但都忍唔住勸喻拉布議員「己所不欲勿施於人」。 對於香港年輕一代，張浚生建議佢哋多啲返內地，了解一下中國嘅過去同現狀，咁先可以建立正確嘅國家民族觀念。 提起末代港督彭定康，張浚生似乎仲係一肚火，佢話彭定康當年搞三違反，「硬推政改方案，撕裂香港社會就是他一手造成；2014年本港發生的『佔中』事件，肥彭不僅在英國國會舉行的聽證會上大放厥詞，之後更跑到香港借『佔中』煽風點火，唯恐天下不亂！」
|
| |
| |
;){kind=small}
