【明報專訊】政務司長林鄭月娥呢排去唔同地方,都成日有人抗議叫口號,理工大學噚日舉行「林大輝廣場」命名典禮,林太到場又遇到學生叫喊「2017一定死得」。不過,活動主角、理工舊生林大輝議員就話,師弟妹示威都算有禮,無打斷活動,話喺揭幕儀式期間,學生有十幾秒無叫口號,講笑話可能佢哋尊重佢呢個師兄。
隔鐵馬叫口號 無打斷活動
理大話將連接賽馬會綜藝館和蔡繼有樓(QR座)、呈扇形嘅廣場面積約1100平方米嘅地方,命名為「林大輝廣場」,表彰林師兄熱心支持理大嘅發展。師兄係喺1981年畢業於理大前身嘅理工學院紡織及製衣學系。
噚日典禮舉行期間,10多名理大學生到場示威,但佢哋都係隔住鐵馬叫口號,無好似日前林太出席活動時被示威者衝前持黃傘抗議。