林鄭未見 局長招呼李國麟
「唔通阿習見先算重視咩」
[2015.04.17] 發表
【明報專訊】政改方案下周三公布，政務司長林鄭月娥呢幾日頻密約見議員拉票，但被視為「撬票」對象嘅衛生服務界李國麟就無份。Emily噚日問李國麟，佢就話司長無搵佢，但係政制及內地事務局長譚志源前日就去佢立法會辦事處傾咗一陣。其他泛民有司長見，自己只能見局長，會唔會覺得被忽視先？李國麟就自我安慰話，「唔通阿習(國家主席習近平)見先算重視咩！」
李國麟話，譚志源登門造訪，但內容都係無料到，主要係講佢知下星期三公布政改方案，大家亦無講安排泛民見京官嘅事。佢又話，司長又好、局長也好，邊個想同佢傾都歡迎，又話其實好想「信心哥」特首梁振英去搵佢，因為知道對方話有信心通過政改，但想知信心何來？
葉建源司長論教育 搭單傾政改
教育界葉建源噚日同林太會面，見咗大約1個鐘。見咁耐唔通林太落足嘴頭「撬票」？唔係啦，事緣係因為葉建源一早約咗林太討論15年免費教育，但之後林太建議不如「搭單」傾政改。所以噚日會上用咗15分鐘講政改，其餘時間都係討論教育問題喎。
有記者向葉建源提出一個好「天馬行空」嘅問題，就係政府有無將教育同政改問題掛鈎，「利誘」葉建源支持政改，咁就可以快手啲解決教育問題。葉建源話梗係無，因為兩者完全拉唔上關係。
更多港聞
【明報專訊】Emily噚日講過，股市暢旺，唔少議員都有斬獲，本身係證券行老闆嘅金融服務界議員張華峰，相信更加盤滿鉢滿，連建制派議員都戥佢開心...
詳情
相關新聞
