中環海濱搭篷開藝展
首辦「衛星展」Art Central

Art Central喺解放軍總部對面嘅中環新海濱舉行，噚日仲做緊工程，未能入去參觀。場地由著名倫敦設計公司Stiff+Trevillion設計，兩名展覽創辦人Tim（左）同Sandy（右）話，比起Art Basel，Art Central嘅風格會比較relax同青春；Tim仲話原本展覽場地喺正海旁，可以用設計配合，惜海旁全被圍欄隔住，唯有打消主意。（李澤彤攝）

Art Central展品中包括雕塑，好似美國女雕塑家Rona Pondick嘅作品，圖為其作品Fox。Pondick嘅作品曾於多個著名博物館展出，包括紐約現代藝術博物館（MoMA）。（Art Central提供）

Art Central着重推廣本地藝術家及藝廊，圖中係The Cat Street Gallery嘅本地藝術家梁志和，按照香港告士打道影像創作出嘅作品Gloucester & Gloucester，會喺展覽中展出。（Art Central提供）

此為著名印尼藝術家Entang Wiharso所創作嘅藝術品Inheritance。（Art Central提供）

【明報專訊】喜歡藝術嘅人有福了，今個周末除咗有近年大受歡迎嘅巴塞爾藝術展(Art Basel)，今年仲多咗個首次喺中環新海濱舉行嘅「衛星展會」(Satellite Fair)Art Central，會喺海邊臨時搭建、足足1萬呎大嘅帳篷入面舉行，主辦單位仲係香港巴塞爾藝術展前身Art HK嘅創辦人。中環嘅藝展，除咗知名畫廊，仲有唔少新晉同本地藝術家參與，預計將吸引超過2萬人入場。

圍住大型藝展Art Basel舉行

何謂衛星展會？就好似衛星圍住地球咁，外國流行舉行大型藝術展嘅同時，喺周邊舉行類似藝術展，方便大家一次過參觀幾個展覽。Emily噚日同Art Central兩個創辦人Tim Etchells及Sandy Angus傾偈，佢哋喺2008年有份創辦Art HK，其後Art HK躍身成亞洲首屈一指嘅藝術展，喺2011年就畀瑞士嘅巴塞爾藝術展母公司收購咗，2013年化身香港巴塞爾藝術展。

Tim話佢哋今次捲土重來，並非要同巴塞爾藝術展競爭，而係睇準香港藝術市場發展快速，有潛力支撐兩個高質素展覽。Sandy話，香港無疑係亞洲嘅藝術樞紐，佢哋早喺出售Art HK時已經計劃喺香港引入衛星展會，可惜比起外國，香港除咗會展，市中心一帶缺乏合適嘅大型場所，政府至上年5月先決定可以出租中環新海濱做商業活動，搞到時間好緊絀。佢仲話，雖然Art Central規模只係巴塞爾藝術展嘅四分之一，但因為要由頭鋪置設備、搭建帳篷，成本反而比喺會展舉行展覽多近4倍，仲預咗第一年會虧損達50萬美元。不過，藝術展係長線投資，一開始蝕係正常，所以估計3年後可以收支平衡。

策展人嘆港缺大型場所

今次Art Central展覽有來自21個國家合共79間畫廊、400名藝術家參與，當中65%畫廊來自亞太區，包括19間香港藝廊。

更多港聞

終院新網站啟用

【明報專訊】終審法院唔係時時開庭，即使開庭市民只能夠到法庭旁聽，普通人根本無可能走入法院大樓內睇吓，不過，終審法院開咗個新網站，將終院大樓內... 詳情

鏞記裝修封地廳3月

【明報專訊】著名食肆鏞記喺第三代掌舵人甘氏姊弟打理下，好快會大變身，坐落中環嘅鏞記大樓將分階段翻新，下個月起地廳先會封廳約3個月，之後逐層裝... 詳情

湯家驊嘆枉作小人

【明報專訊】泛民同中央官員有望見面談政改一事暫時泡湯，公民黨湯家驊（Ronny）噚日喺電台節目上承認自己係牽線人，對於雙方見唔成覺得自己「枉... 詳情

幼教委倡設地區資源中心

【明報專訊】教育局昨向立法會提交文件，指免費幼稚園教育委員會有意見認為，政府可探討設立供幼稚園使用的地區資源中心，提供學習活動。據了解，委員... 詳情

英基10學生國際試「全球最高分」

【明報專訊】去年國際普通中學教育文憑試（IGCSE），英基學校協會轄下有10名學生分別獲附加數學、戲劇及世界文學等科目的「全球最高分」（成績... 詳情