【明報專訊】自由黨上月底響應多個團體呼籲為前線警員募捐，不過中華出入口商會(中出)原來已經快人一步，會長莊成鑫話，中出已經捐咗100萬去警察子女教育基金，為教育新一代警察子女出力，會長話捐錢同佔領行動有關，因為中出覺得警方盡忠職守，又話該會曾經去警署送花，但「無理由次次獻花，阻住個地球轉」，所以捐錢。

莊成鑫強調無人向中出提捐錢要求，呢啲純粹係幾個會董小小心意。捐錢畀警方係要審查嘅，莊會長就同Emily講笑，話連自己呢個「節目主持人」，都畀人起底起到乾乾淨淨，好彩佢「行得正企得正」，一兩個星期前，基金已經收咗佢哋嘅支票。

黃定光再撐周浩鼎選立會

今年中出60周年，之前已經搞咗個「進出口企業大獎」，不過會長話佢哋仲有搞作，將會搞中出慈善基金，暫時籌到300幾萬，主要由會員會董捐獻，資助貧窮學生到內地進修，每年每名學生有萬五蚊。

外界關注中出立法會議員個位由邊個接任，現任議員黃定光(象哥)就再次力撐徒弟、青年民建聯主席周浩鼎(Holden)，Holden潛在對手、副會長許華傑睇嚟要加把勁。