湯家驊惹撐警誤會 引述別人「開頭20枚催淚彈應放」

湯家驊惹撐警誤會
引述別人「開頭20枚催淚彈應放」

[2014.10.15] 發表

【明報專訊】有人話公民黨內個個議員都係「性格巨星」，6名立法會議員隨時有三四個不同立場。公民黨議員湯家驊(Ronny)噚日喺DBC數碼電台節目評佔中，引述律師樓中一個年輕律師意見，指9月28日開頭十多廿枚催淚彈應該放。點知呢番言論惹起誤會，連黨友陳家洛都誤會Ronny講緊個人意見，仲喺facebook出post，話自己親身經歷咗「公民廣場」胡椒清場同催淚彈，「公民抗命者無悔無憾也無必要同情不同情警方」，又留言話「湯家驊議員唔代表我」，叫學生「原諒」Ronny。

湯家驊喺節目中其實係話，發放催淚彈就算真係警方決定，「都不能太怪佢哋」，因為呢個係在場警官在作專業判斷，若大家質疑警方背後有政治動機，整個制度會崩潰，不能「每一次唔啱你時，就話沒有嚴厲執法，啱你時就話唔使執法」。

陳家洛一度稱「佢唔代表我」

Ronny事後同Emily講，個人認為向學生放催淚彈係「不可接受」，佢今日亦會支持泛民議員透過呈請方式，調查警方當日執法決定，至於佢喺節目上亦只係引述一個年輕律師意見，講得好清楚，唔知點解會有人誤會。

Ronny又話，梁振英要為事件負上責任，因當日催淚彈放咗數個小時，梁振英見到應立即叫停，絕不應縱容警隊於往後數小時不斷向手無寸鐵學生放催淚彈，當日警方共放咗3小時催淚彈，不能相信佢作為特首會唔知。

經過一個下午，真相終於解開，家洛就形容佢噚日表現「好克制」，只係幫黨友「道歉」，無乜嘢要澄清，只嘆成件事實在「太老套」。