政黨搵學生「體驗遊行」
催谷8．17反佔中
[2014.08.08] 發表
【明報專訊】為咗搞反佔中可以去到幾盡？建制派出盡絕招，其中一招係有政黨諗到搵一班「香港模擬立法會」嘅中學生參加8．17遊行。「香港模擬立法會」籌委會早排向班學生發出電郵，話有建制派政黨邀請參加「政黨體驗」活動，個活動就係反佔中遊行，咁究竟個政黨係想班中學生去「體驗」遊行，定係去表態反佔中呢？保普選反佔中大聯盟計人數時，會唔會計埋呢班中學生呢？
不過，籌委會噚日喺facebook專頁發聲明，話對政黨一視同仁，仲展示之前嘅電郵，顯示公民黨喺今年七一遊行，都有邀請班學生去公民黨街站體驗遊行隊伍運作。
公民黨七一街站邀學生 冇人參加
Emily問過公民黨總策劃幹事黃晙(Ian)，佢解釋嗰次係遊行前幾日收到籌委會查問有乜活動可以畀學生，嗰時見最近嘅活動係七一遊行，就咁樣回覆，但最終都冇同學嚟參加，因為啲家長話學生唔適合參加政治活動。反佔中大聯盟公關程介南就話，只要活動係和平合法，中學生參加都沒問題。
另邊廂，特區政府推出新一輪政改宣傳攻勢，噚日推出一段15秒嘅影片，唔用硬銷，改為反問。片裏面剪輯咗政改遊行、示威者衝擊鐵馬、包圍政總公民廣場等畫面，話「想變？2017有得普選。 有票，真係唔要？」其實暗地裏話無論個普選方案係點，市民最好「袋住先」。
夜總會大派反佔中簽名表
而建制派近排喺各行各業動員反佔中，連夜場都唔放過，早排港九舞廳夜總會聯合總商會同娛樂界權益關注組，就喺夜總會貼通告，呼籲業界支持反佔中簽名，附送大疊反佔中簽名表，證明「夜場也有愛國的」。
更多港聞
【明報專訊】每年一度嘅電腦通訊節，今個月22至25號喺灣仔會展舉行，主辦商話，因為場地租金等成本上漲，所以今年門票要30蚊，加咗5蚊。Emi...
詳情
【明報專訊】Emily經常要去唔同地方做採訪，間中都有大廈或者店舖有「消失的門牌」情况出現，要靠附近商舖門牌號數去「斷估」。申訴專員劉燕卿噚...
詳情
相關新聞
