克萊蒙特雖然只係一支法乙球會，但今個夏天已經贏來全個球壇的注目。有乜咁把炮？之唔係破天荒成為首支由女教頭領軍出戰職業聯賽的男足球會。雖然他們在歌蓮妮狄亞姬領軍下，作客以1：2不敵比斯特，但咪當呢個前法國女足隊長係花瓶，歌蓮妮在領先時極之淡定，輸波後絕唔畀面痛斥球員「唔識用波」，收放自如的功力拍得住費格遜同摩連奴！

球迷可能5月時聽過女教頭執教克萊蒙特，歐洲次級別聯賽首次出現女教練轟動一時，不過唔好搞錯，葡萄牙人海倫哥絲達上任不久後請辭，故事暫告一段落數天，該支法乙球會再出招，改聘前法國女足隊長歌蓮妮狄亞姬，繼續對女性投下信心一票。

球員生涯為法國披甲121次的歌蓮妮，掛靴後曾任法國女足助教，2010年起執教法甲女足球隊蘇瓦奧達4年。

歌蓮妮上任克萊蒙特不久即獲球隊體育總監沙維安大讚「學習得很快，10天已建立地位」，克萊蒙特今季3場熱身賽不敗，更曾以0：0賽和法甲的巴斯蒂亞，或可引證沙維安的說法。

領先鎮定 落後狂嗌

昨天是歌蓮妮的大日子，既是40歲生日，亦是領軍在法乙的首戰，甚至獲當地電視台直播。歌蓮妮獲比斯特教頭送上鮮花後，克萊蒙特9分鐘便先開紀錄，她並未忘情慶祝只報以微笑，看似明白莫耶斯口中「領先1球永遠最危險」的道理。佢全場在場邊大聲提場，但未能阻止連失2球，令歌蓮妮的生日在落敗中度過。

發火責球員後「呵返」

歌蓮妮賽後發火，鬧人技巧不輸出神入化的車路士「教父」摩連奴：「輸波永遠唔係好事，我們不懂保持控球在腳，唔識用波組織攻勢，在水準以下。」鬧得咁甘，球員會否反面？好在佢好識做「呵返」班手足：「雖然對手表現出色，但我方亦有可取之處，球員年輕當打，很高興他們為我出盡全力，今季大家不能忽視克萊蒙特。」歌蓮妮賞罰分明的態度，絕對可以扭轉開季脫腳，話唔定下季升班，鬥伊巴謙莫域為首的巴黎聖日耳門亦唔出奇。