【明報專訊】大家細細個有無睇yes!!、儲yes閃卡？呢本喺1990到千禧年代曾經受青少年追捧嘅雜誌，終於敵唔過時代巨輪，噚日喺facebook專頁公布停止出印刷版，但係計劃追上時代，喺不久將來推出電子雜誌，意味1219期嘅yes!!將會係告別號。另外，年輕人雜誌COSMO girl亦會改為電子版，最後一期出版係155期。 COSMO girl亦改電子版 yes!!每本售12蚊，逢周五出版，以全天候年輕人雜誌自居。大家對yes!!最有印象嘅，可能係「校花校草選舉」、「愛情急症室」、「 Miss Sex」等欄目，不過對上一代嚟講，yes!!最為人「津津樂道」嘅，反而係90年代同yes!!創辦人兼主編之一倪震有關嘅「毒瘤明風波」。 「毒瘤明風波」最經典 當年藝人劉錫明同藝人周慧敏(Vivian)拍劇後，公開表示欣賞周慧敏，惹來Vivian𠵱家嘅丈夫倪震不滿，倪震就喺雜誌嘅「娛樂圈軼事」專欄不斷抨擊一個叫「毒瘤明」嘅人，結果劉錫明最後去咗台灣發展。不過，呢本雜誌喺2004年賣咗𠵱家嘅出版商。 Vivian噚日回應話覺得好可惜，認為yes!!始終係港人一個青春時期嘅集體回憶，又話雜誌轉網上版係大勢所趨。佢話自己仍然keep住唔少yes!!關於佢嘅報道同yes卡，到今時今日仍有粉絲會送當年yes卡畀佢咁話。
|
| |
| |
;){kind=small}
