【明報專訊】近期建制派總動員，協助「保普選反佔中大聯盟」於全港擺街站收集反佔中市民簽名，連富豪第二代、第三代都幫手。Emily最近喺網上見到由一眾名人之後組成嘅香港青年聯會，動員一眾會董由星期日(27日)起，一連3個星期日，去銅鑼灣時代廣場反佔中街站做義工。 青聯成員大部分係富豪名人之後，主席係霍震霆長子霍啟剛，而人大常委范徐麗泰個仔范駿華就做常務副主席。根據網頁，話未來3個周日「需要大量人手協助」，所以要求會董必須至少抽4個鐘幫手，「確保活動順利進行」咁話。 睇番青聯網頁，原來佢哋有成110個會董，包括「幫港出聲」發起人之一、金城營造集團主席王國強細仔王紹恆，旅發局主席林建岳三女林愛兒，全國政協簡松年個仔簡汝謙等，相信佢哋到時都要幫手。 外國記者簽完才知搞錯 講開反佔中運動，幫手做公關統籌嘅程介南話，近日收集簽名都遇到得意事，例如有外國記者向佢了解反佔中簽名詳情後，即場簽名交表格支持，點知大半個鐘後就返轉頭，話自己係支持佔領中環，要求抽起已填嘅表格，唯有叫對方填寫資料，寫張聲明，抽番起一張表格。程介南笑言自己英文都唔係咁差，唔明點解對方會誤解。不過，睇番反佔中橫額嘅英文，係叫大家「sign for peace and democracy」(簽名支持和平與民主)，又的確容易吸引唔同立場嘅人簽名支持嘅。
|
| |
| |
;){kind=small}
