【明報專訊】「幫港出聲」等組織籌辦嘅反佔中簽名，呢幾日周圍都有街站，民主黨沙田區議員麥潤培前日就去街站現場，測試簽名運動可信度有幾高。佢去街站亂填名，塞咗幾張表入簽名箱，仲話根本無人查核佢身分證，簽完又簽無人理，其間碰見幫港出聲周融，周融唔知「麥仔」係無間道，二人仲開心合照！

麥潤培稱無人查身分證

麥仔事後將過程及相片放上facebook，周融先知原來麥仔嚟搞事，所以幫港出聲亦喺facebook還擊，直斥麥仔係「騙子」，指佢前日親口講過填咗10份表，話做區議員應有誠信，唔應該招搖撞騙，而幫港出聲會想方法搵番麥仔9張表出嚟，並「非常高興得到零的突破，收到民主黨黨員的第一張支持表格！」

不過，麥仔同Emily講，周融話過佔中全民投票有「水分」，但其實反佔中投票安排粗疏水分仲多，反問邊個先喺騙子喎！而麥仔填嘅反佔中表格全部亂寫名，無用自己個名，唔知幫港出聲點樣搵佢份表出嚟呢！

網傳反佔中報今出版

講開反佔中，社運界人士柯華亦喺facebook登咗一張「通告」出嚟，話噚日一個中環報販畀佢，內容係發行公司通知，今日會有人出版「反佔中」報，叫報販放喺報攤顯著位置，仲話會向報販提供100元特別津貼。不過Emily問過一啲相熟報販，就無收到呢個通告。