【明報專訊】警方喺政總東翼外嘅添美道天橋設兩層鐵馬設防，噚日政府宣布總部東翼對出嘅「公民廣場」即日起關閉，有線電視攝記噚日喺現場拍攝採訪，點知大風一吹，成列掛咗藍色警方橫額嘅鐵馬被吹倒，攝記壓傷左腳送院(圖2)。據悉，當時記者正在做直播。

警方本來係用鐵馬分隔警察通道同公眾通道，向公眾通道嘅一邊，有橫額寫有「請勿逗留」字樣，橫額並無刻意開窿，疑因「食風」倒下。事發後警方移走部分鐵馬，亦將藍色警方橫額拆晒(圖1)。

署理警務處長馬維騄話，喺通往政總嘅行人天橋上掛有指引性橫額，目的係與公眾溝通。警方發言人就話，噚日下午接報，一個男人喺添美道行人天橋拍攝期間，一個鐵馬突然被強風吹倒，男子腳部受傷，清醒送瑪麗醫院，案件列「有人意外受傷」。昨日日間天氣漸趨不穩定，警方審視後，已於下午將所有鐵馬拆除。