【明報專訊】南區區議會海怡西補選將喺嚟緊周日(3月23日)投票，3名候選人，人民力量袁彌明(Erica)、民主黨單仲偕同新民黨陳家珮，噚日都趁住呢個選舉前最後周末積極向街坊拉票。好似袁彌明咁，該黨嘅「星屑醫生」歐陽英傑、「慢咇」譚得志、前會計界議員譚香文等，周六都有到海怡同Erica拉票，仲將相片上載到facebook。

袁彌明vs.單仲偕vs.陳家珮

相比之下，單仲偕facebook就仲未見到有大型站台照片，但佢就獲得泛民跨黨派支持，好似公民黨陳家洛、南區區議員司馬文、真普聯鄭宇碩、會計界梁繼昌等，都同過佢站台。單仲偕張banner仲印住前政務司長陳方安生個大名𠻹！

陳家珮就有新民黨主席葉劉淑儀、常務副主席田北辰、副主席潘國山、立法會議員陳健波和謝偉銓等坐鎮，田北辰仲讚陳家珮年輕有為、有腦、有心有力。

不過，有網民話單仲偕張banner令佢覺得有啲怪，因為司馬文畀人個感覺係坐咗喺主要位置，反而單仲偕就企咗喺左上角，都唔知係司馬文參選定係單仲偕參選咁話。