【明報專訊】明報前總編輯劉進圖遇襲一事，政界不論左、中、右都齊聲譴責。早前喺立法會對新聞自由提案投反對票嘅民建聯鍾樹根，噚日同當時無投票嘅黨友蔣麗芸(政壇元秋)一齊出席遊行，鍾樹根更加喺記協橫額上簽名支持，不過蔣麗芸就嫌「They Can't Kill Us All」嘅橫額字句暴力，拒絕簽署。

昔投反對票 樹根簽名支持

對捍衛新聞自由動議投反對票嘅民建聯並無拉隊出席遊行，但就起碼有兩個立法會議員參與。有份出席嘅鍾樹根話「新聞自由當然重要」，而當前最重要係「保護記者」，隨後有記協成員邀請佢喺橫額上簽名支持，佢一口答應，仲好樂意畀大家影相。

至於黨友蔣麗芸就話，香港係法治社會，不容許暴力行為，而記協橫額嘅信息「好似企喺度等人行埋嚟殺你」咁，有暴力成分，所以佢唔支持，拒絕簽名。佢又澄清「民建聯支持新聞自由」，只係唔同意個別議案嘅用字，先投反對票。除咗上述兩人，建制派仲有之前喺新聞自由議案投棄權票嘅經民聯梁美芬，同埋缺席投票嘅工聯會麥美娟參加昨日遊行。