【明報專訊】明報前總編輯、世華網絡營運總裁劉進圖(Kevin)上星期畀冷血刀手斬咗6刀後，佢最老友嘅幾個港大法律系同學，對兇徒暴行非常憤怒，於是發起同屆同學籌款懸紅緝兇，累積款項已經去到70萬蚊喇！發起籌款嘅律師伍兆榮(Ludwig)懷緬昔日時光時話﹕「當年Kevin同我哋幾個感情最好，大家讀書都懶，就到考試，先住埋一齊搏命讀。」

Ludwig仲提供咗一張畢業相，相中個個都係當年最讀得書嘅精英，「𠵱家好多人都喺法律界工作」，其中有唔少人仲係大家耳熟能詳嘅大人物，Emily都認得唔少人。

與袁國強戴耀廷同屆

相入面可以見到，佔中發起人戴耀廷當年未發福，生得眉清目秀好靚仔；劉進圖就戴一副大框眼鏡，成個憂國憂民書生look；港大法律學院首席講師張達明就笑得好smart；而刑事檢控專員楊家雄，個樣就比較嚴肅。相中仲有律政司長袁國強𠻹。Emily又發現，當年劉進圖嘅同學都好多靚女，真係姿色、知識兼備，連Ludwig都話﹕「係呀，OK㗎」。