【明報專訊】前日有網民去旺角「拖篋」示威，以示對自由行旅客嘅不滿，被平機會主席周一嶽批評做法「無聊、無意思」，不過，兩個本土派議員新民主同盟范國威及公民黨毛孟靜就齊聲反駁周一嶽。Miss Mo話周一嶽發表呢啲官話係「非常無聊」，又形容拖篋示威「高層次啲隨時係行為藝術」。范國威就話「公民社會或民間團體有自由表達意見(權利)，唔需要佢(周一嶽)管」。

話尖沙嘴示威稍為粗暴

周一嶽批評「拖篋」活動係「小學生都不認同的歧視行為」，Miss Mo話呢啲係表達自由，批評政府唔肯正視自由行旅客人數太多嘅問題，漠視香港人嘅日常生活受干擾。不過，佢都話之前有網民喺尖沙嘴「驅蝗」嘅行動係「稍為粗暴」。范國威話周一嶽本身公信力已經不高，指佢講呢啲話係「進一步消磨民望」，幫唔到解決問題。

本土派議員政總搞集會

兩個議員會3月2號下午3點會喺政府總部舉行「港人港嘢」集會，反對普教中(普通話教中文)同捍衛廣東話。Miss Mo呼籲出席嘅朋友唔好高叫或高舉有「驅蝗」、「蝗蟲」等字眼嘅口號同標語，因為集會係捍衛廣東話，提醒大家要切題。